周日三班1200米 西摩讓賽是一組實力強勁的三班組別賽事, 部份馬匹季內可望升上二班仍然有一定的戰鬥力, 例如"銀紙"便是我一直非常看好的後起之秀, 然而, 從投注角度與價值出發, 本場我的心水馬是公證福將。

公證福將雖然年届7歲, 但在港服役只兩季, 其健康情況整體欠佳, 直至上季中後期已經見到此馬重踏正軌, 其中幾場谷草短途賽事均於慢閘情況下於終點前展現上佳走勢, 季尾兩場轉跑泥地換上楊明綸更加係1Win1Q, 確認人馬合拍且特擅泥地, 此類馬因為年輕時里程未用盡, 不能因為7歲而蝦佢老, 往往亦因為年紀而少了一份明星味, 是非常不錯的投注對象。

公證福將近期一課泥地閘可以說是乘巔峰之態而臨, 勇得交關, 正常發揮之下怎麼說應該都會在末段交出悅目的走勢, 我非常期望此馬可以排眾而出, 而暫時估計此馬可能會有5-8賠左右分頭, 希望到時會更好分吧。

正如開首所說, 本場三班是極強組, 前中後置均有實力馬在陣, 賽事形勢, 預期 好好利高 會一如既往利用其噴射前速帶足1100米, 上季征服三班或多或少有賴黃俊的減磅, 今季要再進步, 目前實力值三班中。 酷比哥 是正路實力馬, 今季仍會進步, 可守前而末段亦能交出有力衝刺, 絕對是爭勝份子但未必有值搏率。 競駿天驕 初跑泥地而賽前試1200泥閘一放到底, 以其三班田草頭馬級數, 加上潘頓肯騎, 數據上搏殺機會十分大, 成功率亦高, 不能小虧。 銀紙 係非常好馬, 亦係我最睇好最有上升空間既馬, 強配雷神, 父系 Hard Spun , 泥地能力只會更強, 爭勝份子。其餘馬匹站於邊線, 除 銀河飛馬 明顯較弱之外, 其他馬係隻隻都有機會跑近, 所以會係一場非常刺激極具參考的強組賽事。以上各馬匹均有上佳機會及其優點, 因此, 我預期公證福將本身能力仍未盡露而本場肯定有一定分頭, 可能是全場最有 value 的一匹下注對象。