1. 時時精綵 - 全場最有 class 既馬, 目標清晰不過, 早於前季已攻下此項大賽, 當時蹄下敗將包括雍容白荷、樹林之靈等, 級數之高已是無容置疑。上季參加此賽卻因為排在大外檔影響走位部署, 被迫於早段帶頭, 完全違反一貫跑法之下仍然可以頂到第三, 已經非常不錯 ; 再者, 此馬原來已經連續15場不脫三甲, 作為馬膽已經是不在話下，

今季一直以來部署一切正常, 能力上雖然未可再進, 然而只要保持上兩季的態況已經足以在此輕勝。

2. 任我行 – 目前為止生涯最大成就係贏過一場G3, 當時對手其實冇乜邊隻叻, 今季亦未見有 form, 而同場相信幸福掌聲亦唔會比佢慢放, 要偷到雞幾乎係冇咩可能。

3. 好好瑪 – 同任我行一樣, 最叻贏過一場G3, 且要追溯至兩季前, 其高峰期明顯已過, 而一再證明其能力最多只值一班中長距離中線, 與時時精綵等我相差太遠, 此場出馬不多下, 睇下會唔會爭到4-5名取回些少獎金。

4. 時時有餘 – 上季以大吡為目標, 可惜進度尚差一線, 今季進步, 上仗在G2 敗在強手之下得第三, 今場主要對手是擂台躉及兩匹外隊馬, 要贏實在不易, 3甲機會濃。

5. 鬍鬚漢 – 最叻贏過一場意大利G2, 前次跑Arc 係過百倍大冷門, 照計呢場有1喺度唔會輪到佢, 本身亦已經7歲, 反正過去咁多年瓶賽, 唔似會跑出呢 d 水準嘅馬。

6. 幸福掌聲 – 生平跑得最靚一次係上季打吡, 以240倍超級大冷門身份喺薛恩跨下中段加速走甩, 最後只輸條頸比全熱門金槍六十, 之後再跑幾仗暫時無以為繼, 呢個馬房嘅馬演出有時係神神化化, 愛爾蘭馬應該好少早熟早殘, 將來可能仍然係有用嘅馬, 睇下布宜學今次可唔可以做返佢上季中段走甩嘅能力, 但要走甩1係好難好難。

7. 業界巨頭 – 唯一一匹有資格同1號對撼嘅馬就係佢, 對上一場正正係勝出G1巴黎大賽, 上場 skip Arc , 少一場硬仗而茅頭直指今場, 跑出水準絕對係其中一匹爭勝要角, 3歲仔如日方中, 過往拚搏亦唔算多, 本身係外地亦係有一定名氣。情感上同往績各方面似乎仍係以1號比較秤先, 然而呢場主要想睇下呢隻 Mogul 可以交出幾多水準, 對時時精綵有幾大威脅, 如果呢場冇左呢隻馬基本已經無甚瞄頭, 非常期待其交出本身實力, 走出亮麗一仗。